بيجاما خضرا مخططه

بيجاما خضرا مخططه
بدل الكفن متظبطه
على ايد وحوش مخططه
يلبسها ناس مستعبطه
يلبسها ناس نايمين جمب الحيطه زاحفين
ساكتين , يتوشوشو من بعضهم خايفين
يقولك من خاف سلم !
و من نام حلم
البس بيجاما و خش نام
و فى نص الحلم صخور تقع و بيوت تقع
الحلم ضاع و الولد الضاع و كله ضاع
ناس تموت تحت الصخور لابسين بيجاما
و ناس تموت غرقانين لابسين بيجاما
و ناس تموت متفحفين فى القطر اياه لابسين بيجاما
و يطلع علينا مسئول كبير يسأل سؤال ملوش مثيل
ايه يعنى هى المشكله ؟
كام الف ماتوا ولا مشكله و لا معضله
مين يعنى هيسأل هم مين ؟
متقلقوش دول شهدا فى الجنه متنعميين
دا فى ناس كتير زيهم مستنين حتفهم و يتمنوا يونولوا حظهم
هو ناقص ايه محصلش لسه علشان نخلص منهم ؟
عشش صفيح و بيوت ورق
و أبدان مريضة بألف داء من غير دواء
لابسين بيجاما و مكتومين
عايشين نايمين ميتين
مش محسوبين مش معدودين
مفعول بهم مش فاعلين
ظالم نظام يسرق حياة المحرومين
المزنوقين فى اوده ضلمه ضيقه
البس بيجاما و خش نام
أسمع يابنى الكلام
أسكت خليك فى حالك
مش بقولك من خاف سلم
و من نام حلم
فول و ملح و كام رغيف
دا حلم ناس لابسين بيجاما
خايفين الصبح يطلع مايلحقوش طابور الندامه
البس بيجاما و خد مكانك فى الطابور
لأجل الفطور ولا السحور
ينزل الواد يا ولداه يلاقى خناقه مستنياه و يموت شهيد فى وسط الطابور
يطلع مسئول مهيب يقول متقلقوش و ما تخافوش
المواطن الغلبان مات شهيد الرغيف
و لذلك قررنا نصرفله الف رغيف ضعيف
بيجاما خضرا مخططه بدم الغلابه منقطه
بيجاما متظبطه بأيد وحوش مبيرحموش
اسكت تعيش
حشش تعيش
خد على قفاك تعيش
البس بيجاما و نام تعيش
ماتغطنيش يا أم العيال ما تصوتيش
دا موت مؤقت
هايجى يوم و اقلع بيجامتى
هايجى يوم تقوم قيامتى
هايجى يوم اصرخ وأغير
هايجى يوم أحكم و أحاسب
و كل ندل يعرف مقامه
و كل فاسد ينول حسابه
أمتى القيامه
أمتى القيامه
أمتى القيامه
********************************
من أجل من ماتواو هم يحاولون الحياة - مصر 2008
احمد حنفى

الدويقه اخيرا و ليس اخرا

القاهره 8 سبتمبر 2008 م , 8 رمضان 1429 هـ , الساعه الواحده بعد منتصف الليل

بينما أجلس هنا لأكتب تلك الكلمات التى سيقرأها من يقرأها يرقد " مئات " من البشر , مئات من نفس جنسى يرقدون تحت تلال من الصخور فى منشية ناصر منطقة الدويقه عقب أنهيار صخرى فى هضبة المقطم ,أقسم انى لم أحاول ان القى اللوم على أحد فانها أرادة الله شاء ان ينهار جزء صغير من هضبة المقطم مثلما شاء الله ان يحترق مجلس الشورى و مثلما شاء الله العلى القدير ان تغرق العبارهو يغرق 1034 انسان و يحترق بعض من كان عليها قبل ان يرقد الباقى من أجسادهم فى قاع البحر الاحمر و شاء الله ان تحترق القطارات و شاء الله ان تنهار العمارات و شاء الله ان يموت الناس فى نزيف الطرق السريعه و شاء الله ان يولى علينا من لا يخافه و لا يرحمنا ,

حتى نجد حل لمشكلاتنا يجب ان نحدد المشكلات اولا
المشكله التى نواجها الان ليست أنهيار الصخور و أحتجاز المئات تحتها
المشكله هى أنقاذ الناس

طيب علشان ننقذ الناس لازم خطة طوارئ

أصبحت المشكله الان اننا عندنا قانون طوارئ و ليست خطة طوارئ

و يكون فى خطة طوارئ ليه ؟يعنى ايه أهمية وجود خطة طوارئ ؟

أحنا ارخص حاجه فى بلدنا

ربنا يسلم على الناس اللى تحت الانقاض لكنى لا أنتظر أن ينقذهم احد

والله انا متفائل بس انا باحضر نفسى علشان لما تحصل المصيبه أكون مستعد نفسيا

عارفين انا دلوقتى مشكلتى ايه !!؟

مشكلتى أن الدويقه مش حتكون اخر كارثه قوميه فى مصر ى و انتظروا المزيد

الصورة من حاتم فراج

******************************

بعد حريق مجلس الشعب فى تعليقى على مقال خيرى رمضان ينتقد فيه القانون الذى برأ الجميع من مسؤلية حريق المجلس كتبت هذا الكلام بتاريخ 31 أغسطس يعنى من أسبوع تقريبا

يا جماعة بجد كفاية رغى و كلام فاضى
ممكن حد يقولى مجلس الشورى دا كان ايه لازمته ؟
ايه المشكله يعنى ان اتحرق !!! ما فى ستين داهيه !! شوية عرايس خشب و مسرحيات فارغه !!

ممكن حد يقولى اذا كان فى البلد كلها مبنى واحد غير سيتى ستارز له خرائط هندسيه ؟
خرائط هندسية !!!!!! بجد انا حاموت على نفسى من الضحك !! يا جماعه مصر كلها مفيش فيها طريق واحد مرصوف عدل الا طريق العين السخنه و الحمدلله معظم الطريق من غير انوار و من غير رصيف !!

انتوا عارفيين لو كان فى شوية هوا كان زمان القاهرة كلها ولعت

البلد مفيش فيها مطافى !! مفيش فيها اسعاف!! مفيش فيها بوليس يحمى الناس الا قليل جدا !! مفيش رعايه صحيه !! مفيش حاجه يا جماعة اصحوا شوفوا حالنا وصل فين !!

90% من مشاريع البنيه التحتيه و الأساسيه فى مصر بتخلص مناقصتها بالرشوه !! عايزين يكون شكلها ايه

فاكريين حريق القاهرة لما قالوا ان الملك هو اللى ولعها و ناس تانيه قالت اليهود اللى ولوعها !! احنا اللى ولعنها بغبائنا و سكوتنا على الظلم و الفساد و الرشوه

أقسم بالله العظيم احنا عايشيين بستر ربنا

و انتظرونا انشاءلله فى مزيد من الحرائق و المصايب و الانهيارات و النكسات !! و الواحد بيدعى ربنا فى الايام المفترجه دى ان البلد تنضف او اخد انا جنسية تانيه

******************************

انا كتبت الكلام دا من أسبوع واحد و ربنا يسلم و ما تحصلش حاجه تانيه قريب

التدخين لا يقتل حتى اسألوا حمدى بالالا

مسكت علبة سجاير واحد معرفه من يومين و ضحكنا كتير على صورة الراجل المطبوعه على علبة السجاير و ازاى انه شكله اسد و كله صحه و الحمدلله و ان وضع الصورة بالمنظر دا على علبة السجاير لا يفيد حملة وزارة الصحه ضد التدخين بل على العكس دا حيشجع اللى بيشرب انه يشرب , الرجل صاحب الصورة اسمه حمدى بالالا و بالصدفه لاقيت جروب لمعجبين حمدى بالالا على الفيس بوك...اللى هو فى الحقيقه سواق ميكروباص و بيعشق السجاير و عمره ما تعب منها ,و دلوقتى هو رافع قضيه على الحكومة !! لان مفيش حد قالوا انهم حينزلوا صورته على علب السجاير !! بصراحه انا مش مستغرب من سوء تنظيم حملة اوزارة الصحه ضد التدخيين لانها زى كل حاجه فى البلد بتم من غير تخطيط !! عادى يعنى ما هى كلها بقيت بالالا

الصور من محمد رمضان & محمد عصام

رمضان الخير

كل سنة و الكون كله بخير