هو انت عنصرى ؟
سؤال واضح و محدد و صريح
طبعا حتقولى لا انا مش عنصرى
طبعا حتقولى لا انا مش عنصرى
فكر كدا قبل ما تجاوب و قولى كام مرة شوفت أطفال صغيرين بيشتموا واحد او واحدة من أصحاب البشرة السمراء و متدخلتش علشان تمنعهم او حتى تعتذر للانسان دا او تحاول تساعده او على الاقل تحاول تتكلم مع الاطفال و تفهمهم ان اللى بيعملوا دا غلط
فكر كدا و قولى كام مرة سمعت أتنين تلاتة واقفين بيتكلموا على أصحاب دين اخر غير دينك بطريقة بذيئة و لم تحاول الاعتراض او تصحيح المفاهيم
فكر كدا و قولى كام مرة ضحكت على نكت بتستهزئ بساكنى المحافظات الاخرى زى الصعيد و المنوفية و الشرقية !مع أنهم أذكى و أطهر مننا نحن ساكنى العاصمة و أخوتها
لحظة واحدة
بالرغم من أنك ممكن تكون عملت كدا كذا مرة !!بس لو أى حد سألك ايه رأيك فى صاحب البشرة السمراء ! او صاحب الدين الاخر حتقول انه أنسان و له نفس الحقوق اللى ليك !! يعنى أحنا مشكلتنا اننا عنصريين بس من غير مانقصد !
أ
كنت بحضر حفلة أنا مصرى فى الساقية لفرقة أيهاب عبدة و الفرقة بتغنى أغانى بتقرب من المصريين بمختلف الوانهم و بترسخ فكرة الأنتماء للبلد و قبل ما الحفلة تخلص وقف أيهاب عبدة و أتكلم عن أحد أعضاء الفرقة و هى ميشيل الامريكية صاحبة البشرة السمراء التى رفضت الحضور !! لانها تُعامل فى الشارع المصرى بطريقة مهينة و أكثر من مرة تم سبها بطريقة او بأخرى و لما راحت القسم تشتكى الظباط ضحكوا انها جاية تشتكى !!! يعنى حتى الظابط مش عارف يبينلها انه مهتم بالموضوع !بس عادى يعنى مش غريبة !! طبعا هى أتصدمت و رفضت تنزل الشارع تانى
المهم انى حسيت انى مش سلبى و لا حأقدر أعيش سلبى انا بعت أيميل لأيهاب عبدة و هو بعتلى أيميل ميشيل و بعتليها أيميل باعتذر فيه عن اللى حصلها و قلتلها اننا مش كلنا سلبيين و مش كلنا عنصريين
دا أيميل ميشيل يا ريت تاخد من وقتك دقيقة واحدة و تحاول تثبت انك مش عنصرى او انك رافض تكون عنصرى
pangaea_services@yahoo.com
21 comments:
فى عنصريه سلبيه وعنصريه ايجابيه
انا ضد السلبيه اللى انت زكرتها ومع الأيجابيه
المشكلة ان معظمنا في كتير
من الاحيان بيبقي
كده
.
المماراسات ديه السينما عندنا بدبينها كأنها حاجة عادية واهو هزار ونضحك شويه ...
يا احمد الفكره مش فى كده انا الأول اشوف الى اتريق عليها ده شكلو ايه من الأساس؟؟؟؟ لو ابيضانى تلااقيه شبه الجبنه النستو اصلاا ويا اما هو شبه البتنجانه ....احنا اصلاا شعب اسمرانى ونصنا لو كان استنى فالفرن شويه كمان كان زمانو اتحمش.....وبطبيعة الشعب المصرى لو مش لااقى حاجه يتيريق عليها بيتريق على نفسو
لو هبعتلها عالشان افهمها العكس مش هبعتلها اقولها ان مش كلنا سلبيين لا هقولها تقول ايه لما حد يتريق عليها...بسيطه هى كمان تتريق عليه......وعلى رأى واحد لو واحد صاحبك طلب منك اخر سجاره فالعلبه ارمى العلبه بالسجاره واحرق دموكو انتو الأتنين
السلام عليكم
أنا بحييك بداية على البوست الجميل
وأنا فعلا مش عنصري خالص
لأني والله بجد بدافع عن أصحاب الديانات الأخرى لما تتقال لي نكتة عنهم فيها سخرية ..
وبدافع عن السود والصعايدة والشرقاوية
لأن لي أصول سوهاجية وأخرى شرقاوية
بس بصراحة المنايفة ملهمش حل مبعرفش أدافع عنهم بحاول بس بفشل دايما بيكون اللي قدامي أقوى في دي بالذات
المهم إني فرحان لأنك بتروح الساقية وأنا من زوارها ياريت أقابلك هناك
زعلان لأن ميشيل اتعاملت وحش في مصر .
آدم
محمد عبد الغفار
أحييك على الايجابية
يا ريت تقولى ايه هى العنصرية الايجابية
؟
Amr Ahmed
ايوة يا عمرو فعلا هى دى مشكلتنا اننا عندنا ثقافة العنصرية بالرغم من اننا بنرفضها بس المهم اننا نتغير
قليل من التفكير
فعلا عندك حق ! بس انا مش مستغرب كتير لان معظم افلام الكوميديا اللى موجودة دلوقى تقريبا قائمة على التريقة سواء كان الممثل بيتريق على الممثلة اللى معاه او على ودان الممثل المساعد او على واحد أسمر اهم حاجة هى التريقة
Cam Girl
انتى جبتلى هسترية ضحك اصلا قبل ما انام امبارح ! يا بنتى انا بتكلم فى ايه و انتى بتتكلمى فى ايه و عمال اقول العنصرية !!مين يتريق على مين
اقلك على حاجة !! انتى بالذات ملكيش دعوة ب ميشيل خالص سيبينى انا بابعتلها
Adam
ربنا يخليك يا أدم
البوست ما هو الا رسالة علشان اللى مش واخد باله من تصرفاته ياخد بالة
انشالله اشوفك هناك
يا ريت يا أدم تبعتلها أيميل و تقولها أحساسك دا علشان تعرف اننا مش كلنا عنصريين
إني مش باخد أكشن ضد العنصرية دي حاجة
وإني أكون عنصري دي حاجة تانية
يعني مش عشان ضحكت علي نكته علي الصعايدة - اللي أنا منهم - أبقي عنصري
متهيألي الموضوع أبسط من كدا
السلبية هي المشكلة الحقيقية
متهيألي وراها خوف
تحياتي
أنا مش عنصري يا
H
وعااااوز أشووووفك يوم الثلاث الجاي :
إلى كل المدونين المصريين، ومحبي الأدب،وبهاء طاهر ، ومصر :
أدعوكم، وتدعوكم ورقة وقلم .... إلى الاحتفالية المقامة بمناسبة فوز بوكر العربية ببهاء طـاهر ، وذلك يوم الثلاثاء القادم .... الأول من إبريل ... في نقابة الصحفيين الدور الرابع ... السادســـة مساءً
ايميل الاخت بوكس وصل
الخوف ان حد يكون عنصري و يبعتلها فيروس
هاهاها
تحياتي
tab ana ha2olak 7aga msh hatsad2ha ana samra el smar el 3dy bta3 ay 7ad mnta 3rfny el mohm 2ny wana so3'ayra fe 5 2btda2y hhhhh kan msh 3andy as7ab 3shan ana samra hhhhhhhh bgad kol ama afteker el bd7ak awyyyy leldrga de 27na rfdeen ay 7aga 3'reba 3anena w 3ala fekra msh bs fe el loon aw el deen bs kman el fekr tl2ena msh bnmshy 3'er wara el 7agat el salbya laken wara el 7agat el 2egabya lazm nantkedha........
اول حاجه مدونتك حلو اوى
تانى حاجه انا لاحظت ان المصريين كلهم بالطريقه دى مش بيسيبو حد فى حالو وعلى طول يتريقوا على اى حد زى مايتكون الحكايه دى داء وبيجرى فى دمهم
دنا حتى والله ابتديت اتعدى واتريق على الناس انا كمان من غير قصدى
بس كويس انك قلت الكلمتين دول رجعتنى تانى
بس انا بصراحه مكنتش بسكت لاى حد كان بيكلم عن حد ادامى او بيجيب سيرته او بيدايقو باى شكل من الاشكال
بس صبراحه كنت بضحك على النكت دى لانى اصلا كنت اول مره اسمعها
بس بعد كده هابقى امسك نفسى ومضحكش
الأيجابيه انك تكون متحيز ومتصلب ومتعنصر لقضيه حق
Alien
ماشى يا عم الايجابى بعت ايميل للبنية ولا كسلت ولا مقتنعتش انك المفروض تبعت اصلا
أبراهيم
اوك يا هيما ابعت ايميل للبنية بدل ما انت جى تعمل اعلانات
انشالله يا هيما اشوفك هناك
Sampateek
يا نهار اسود !! فيروس !!لا لا لا الناس هنا محترمة !!
وحياة ابوكوا يا جدعان محدش يستهبل
Rania
shofy ana a3rfk ba2ly kam sana !! Awl mar aa3raf enk samra !! ya bnty anty am7wyaa !!
3andk 7a2 ya Roni !! bas isa fe nas bett3'ayr we 7aygy yom kolna net3'ir isa :)
ftafeet
شكرا يا فتافيت ! كلك ذوق و انا كمان عاجبنى شعر البنوتة الصغيرة دى اوى
لا مش المصريين كلهم طبعا بس فعلا فى ناس كتير كدا و يا ريت يتغيروا
محمد عبد الغفار
مش عارف يا محمد بس انا رافض اللفظ نفسة مع انه ممكن يكون صح بس مش قادر اتعاطف مع الكلمة نفسها و طبعا الاختلاف فى الرأى لا يفسد للوز قضية
مش عارفة يا أحمد
أنا مختلفة معاك شويتين
بصراحة عمري ما حسيت بمشكلة في الشعب المصري مع أصحاب البشرة السمراء
بالعكس ده كل الناس بتعشق شعب أسوان والنوبيين وجمالهم .. وحتي السودانين .. ما شاء الله ماليين البلد وتلاقيهم في كل حتة .. مش حاسة بمأساة العنصرية زي ما أنت شايفها
لكن .. يمكن موضوع راشيل مختلف لإنها أمريكية .. فمثلاً بعد حركة زي حركة قناة السويس الأخيرة وما شابه.. فمتستغربش لو ضايقها الناس .. وإن كان ده تصرف مرفوض وغير أخلاقي طبعاً لإن فكرة التعميم فكرة خاطئة ومرفوضة ..بس وقتها المشكلة مش هتكون عنصرية .. المشكلة هتكون الخلط بين المفاهيم
لكن إن يكون غالبية المصريين بيعانوا من العنصرية .. صراحة أنا بختلف معاك قليلاً
مش معني كده إن رأيك غلط بس يمكن هو مبني علي أساس حادثه مريت بيها في حين إني لم أعايش موقف مشابه
بس برضه الموضوع يستحق الملاحظة وتسليط الضوء عليه .. لحسن نكون بنتحول وإحنا مش واخدين بالنا
إيمان
أيمان
سؤال واحد بس يا أيمان ؟
راشيل مين ؟
هى اسمها ميشيل
بصى انا حاقولك على حاجة, انا اتربيت فى حى شعبى عريق و كان فيه قدام بيتنا عمارة حوالى 40 شقة مش مصريين كانوا من جزر القمر و من رواندا و جنوب السودان و جبال النوبة و دارفور !! و ارتبطت بالناس دى جدا و عشت معاهم واعز اصدقاء حياتى فى الفترة دى كانوا منهم
بلاش بقى أحكيلك حكاوى كتيير كانت بتحصل معاهم ممكن تفتكرى انا بقراها من الف ليلة و ليلة بس فعلا انا شوفت الحكاية اللى حصلت مع ميشيل كتير جدا فى مصر !!و على فكرة الموضوع مش اكتر من عيل صغيرة بتشتم مثلا و مفيش حد يقوفهم يعن ى المشكلة فى سلبية الراجل او الست اللى شافوا كدا و متكلموش
انا مش شايفها مشكلة ان يكون رأيئ غلط ! و حاش لله ان اتهم المصريين كلهم انهم عنصريين ! بس انا كل همى اننا ناخد بالنا من تصرفتنا لاننا حنتحاسب على كل صغيرة و كبيرة و ربنا يعافينا انشالله و كمان كنت عايز اننا كا مصريين بنقول للناس التانية اننا متحضريين و بنعرف نعتذر لو غلطنا
تحياتى
تفتكر اكمني بضطهد طهقان ابقى عنصرية؟؟؟
لا و النبي ده انا قلبي و لا حتة الجبنة القريش
اوروفوار
عزيزي الشعب
أنا بعتت لها رسالة وهي ردت عليّ
سعيدة جدا بالاهتمام بيها
من كل اللي بعتوا لها
وهي بخير حاليا من حيث نفسيتها
شكرا لك انك عرفتني بإيميلها
عشان أساعد إني أحسسها
إنه لسة فيه مصريين كويسين
مع تحياتي لك
آدم
أنا شخصيا عمري ما حسيت أني عنصري
أنا بس عصبي بالزياده في الكورة
:)
تحياتي يا أبو حميد
دا احنا بنيقى عنصريين في كتير من الواقف من دون ما نحس خدللك مثلا عندنا عنصرية فظيعة بين الفلسطينين والاردنيين في الاردن نفسها وتجي تشوف العنصرية بين الفلسطينين نفسهم انه دا فلاح وده مدني وتجي تلاقي الاردنيين بينهم عنصرية دا من الشمال ودا من الجنوب
وفي بيتك نفسه عنصرية ده شاطر بالمدرسة يستحق اكتر وده كسلان خليه متعاقب
دي بنت وده ولد
حتى لو مافيش عنصرية جوانا حنلاقيها بدمنا
بس انا عندي لعبة سمرا تجنن بحبها اوي وبحب السمر كتير
انا بجد سعيده بالخطوه اللى انت عملتها دى يا احمد
ميشيل دى واحده من اجمل الأرواح اللى قابلتها.. وماعتقدش ان ليها ذنب فى كل اللى بيحصلها ده لمجرد انها سمراء
انت لو كنت حضرت حفلة الجامعه الامريكية كنت سمعت صوت واداء مش اقل من ويتنى هيوستن واحساس عالي يعيشك فى عالم تانى
ولو كنت كلمتها كنت لقيت فيها خفة دم أكتر من المصرين نفسهم
بعتلها ايميل بعد الحفله اعتذرلها بالنيابه عنى وعن الفرقه وكل المصريين
وعرفت منها انها قدمت شكوى فى المحكمه بس ماعرفتش ايه اخر التطورات
هى مارضيتش تسكت ولا تبقى سلبيه قدام اللى بيحصلها واتحركت عشان تدافع عن كرامتها
قالتلى انها حبت الفرقه وبتحب مصر قوى لكن بتكره اى حد يقلل من كرامتها
عشان كده ماقدرتش تغنى معانا لناس شايفه السخريه فى عنيهم
انا احترم موقفها وعزة نفسها جدا وماقدرش أقول غير كده
السلام عليكم
ياأ.احمد دي ثقافة شعوب الكلمة دي سمعتها واغاظتني جدا عندما طلب مني احد معارفي ان ارشح له عروس والطبيعي أن أسأله موصفتها آيه ...رد بسرعه وبدون تفكير تكون بيضاء جميله ...قلت له بس ...قال لي بس هو فيه حاجه تاني
قلت له أيوه الدين والأخلاق ياستي خليها علي الله...وعندما أثرت الموضوع للمناقشه سمعت العجب إن الفتاه اللي عندها في العيله مراكز ولا منعيله متريشه ممكن يحصل تنازل ونتقدمها حتي لوكانت سمراء
اللي عجبت له إن شباب ملتحي يطلب صاحبة البشره البيضاء وكان هذا بيدها
مع أن الرسول صلي الله عليه وسلم قال
إن الله لاينظر الي وجوهكم ولكن ينظر قلوبكم
وقال أيضا تنكح المرأة لإربع لجمالها وحسبها ومالها ودينها وإظفر بذات الدين تربت يداك
أما الإستهزاء ببعض سكان الأقاليم والتي تأخذ علي أنها مزحه كانت ستؤدي الي كارثه في احد القطارات عندما ألقيت نكته علي الصعايده لولا ستر الله
أصعب شئ دخول الديان في التهريج والسخريه وده شئ لايرضي الله عز وجل
معذره علي الإطاله .....وبحييك علي مدونتك وقصصك الرائعه
Post a Comment